“Pari NN” futbol jamoasi bosh murabbiyi Aleksey Shpilevskiy uchinchi tur doirasida Moskvaning “Lokomotiv” jamoasiga qarshi o‘yinda muxlislar yetishmasligi haqida o‘z fikrini bildirdi. Bu haqida Euro-football.ru xabar berdi.
Ma’lum qilinishicha, uchrashuv Grozniy shahrida o‘tkazilgan. Buning sababi, “Pari NN” jamoasining o‘z maydoni ta’mirlanayotganligi bilan bog‘liq.
Murabbiy Grozniy shahriga minnatdorchilik bildirgan holda, uy o‘yinlarini neytral maydonda o‘tkazish oson emasligini ta’kidladi. U jamoaga o‘z muxlislari yetishmayotganini va tez orada o‘z stadioniga qaytishni intiqlik bilan kutayotganini aytdi.
Uchrashuvni bor-yo‘g‘i 232 kishi stadionda tomosha qildi. “Pari NN” jamoasi zaxira stadion sifatida Saransk shahridagi arenani ham ko‘rsatgan edi, biroq u yerda ham hozircha tayyorgarlik ishlari yakunlanmagan.
Uchrashuv natijasiga ko‘ra, “Lokomotiv” jamoasi 3:2 hisobida g‘alaba qozondi va uch turdan so‘ng musobaqa jadvalida birinchi o‘ringa chiqdi. “Pari NN” esa o‘z muxlislari oldida o‘ynash imkonini kutmoqda.
