Superliganing 2-turidan o‘rin olgan "Sho‘rtan" - "Bunyodkor" (0:2) uchrashuvidan so‘ng mehmonlar bosh murabbiyi Ilyos Zeytullayev matbuot anjumanida ishtirok etdi.
- Barchaga xayrli kech. Zo‘r atmosfera uchun futbolchilarga va muxlislarga raxmat. Bugungi uchrashuvda jamoamiz a’zolari mas’uliyatni his qilgan holda harakat qilishdi. Natija uchun javobgar ekanimizni barchamiz yaxshi tushunib turgandik. Oson o‘yin bo‘ldi deya olmayman, har ikki jamoa ham oxirigacha kurashdi. "Sho‘rtan" jamoasiga navbatdagi bahslarda muvaffaqiyat tilayman.
- "Bunyodkor" tarkibidagi legioner jalb etilishi haqida aytib bersangiz...
- Bizda seleksiya ishlari doimiy davom etadi. Mavsum oldidan bir qator legioner futbolchilar jamoamizda ko‘rikdan o‘tishdi. Bizga sifatli futbol namoyish etadigan legionerlar zarur edi. Kachorri dubl qayd etganidan xursandman. Legioner yoki mahalliy futbolchi bo‘lishi ahamiyatsiz, muhimi jamoamizga nafi tegishi kerak.
- "Sho‘rtan" siz kutganchalik qarshilik ko‘rsata oldimi?
- Jamoani yaxshi o‘rganib chiqqandik. Bu jamoa tarkibida bitta vaziyatdan unumli foydalanib keta oladigan ijrochilar bor. Ehtiyotkorlik har doim futbolning ajralmas qismi. Mavsum endigina boshlandi, hozircha xulosalar uchun erta.
- "Bunyodkor"ning yorqin davrlarini yaxshi eslaymiz. Jamoa qachon yana o‘sha darajasiga qaytishi mumkin?
- Zo‘r savol. "Bunyodkor"da yorqin tarix bor. Biz barchamiz hozir jamoani avvalgi davrlariga qaytarish yo‘lida ishlayapmiz. O‘tgan mavsumlarda klub anchayin inqirozlarni boshdan o‘tkazdi. Yoshlar bizning kelajagimiz, biz o‘yindan-o‘yinga o‘sib borishimiz kerak.
- Bugungi o‘yin darajasidan qoniqdingizmi?
- Albatta, natijadan kelib chiqsa, qoniqish mumkin. Safarda g‘alaba qayd etilishi yoqimli holat. Lekin mavsumning boshi bo‘lgani sabab kichik xatolar ham ko‘zga tashlanib turibdi.
- Italiya futboli himoyaviy futbolga asoslanadi. Murabbiylar shtabingizda italiyalik mutaxassislar bor. Lekin "Bunyodkor" ko‘proq hujumkor futbol o‘ynamoqda. Siz raqibga qarab o‘yin qurasizmi yoki joriy mavsum hujumkor futbolni maqsad qilganmisiz?
- Hozir hamma futbol o‘ynashni biladi. Jismoniy imkoniyatlardan kelib chiqib harakat qilishimiz kerak. Har bir o‘yin raqibdan kelib chiqqan holda quriladi. Hujumkorlik bizning asosiy maqsadlarimizdan biri, shu orqali g‘alabalarga erishishimiz mumkin.
