Myunxenning mashhur “Bavariya” futbol klubi sobiq prezidenti va afsonaviy futbolchi Uli Xyoness shoshilinch tarzda shifoxonaga yotqizildi. Bu haqida Euro-football.ru xabar berdi.
Xabar berilishicha, voqea Myunxen shahriga yaqin hududda bo‘lib o‘tgan. Uli Xyoness golf musobaqasida ishtirok etayotgan paytda qon tomiri yorilib ketgan.
73 yoshli sport faxriysi darhol shifokorlarga yetkazilgan va unga zaruriy tibbiy yordam ko‘rsatilgan. Mahalliy ommaviy axborot vositalarining ma’lum qilishicha, hozirda Uli Xyoness shifoxonadan chiqarilgan va uning ahvoli yaxshi.
Shifokorlar uning sog‘lig‘i barqaror ekanini bildirgan. Eslatib o‘tamiz, Uli Xyoness 2019 yilda “Bavariya” klubi prezidenti lavozimini tark etgan edi.
Biroq, u klub faoliyatidan butunlay chetlanmagan va hozir ham jamoa hayotida muhim rol o‘ynab kelmoqda. Uli Xyoness Germaniya futboli tarixida o‘zining faoliyati va xizmatlari bilan katta iz qoldirgan shaxs sifatida e’tirof etiladi.
