Garnacho Chelsiga o‘tishni xohlaydi, ammo transfer tez kutilmaydi

Manchester Yunayted futbolchisi, 21 yoshli argentinalik vinger Alejandro Garnacho klub bosh murabbiyi Ruben Amorim rejasiga kiritilmadi. Bu haqida Euro-football.ru xabar berdi.

Yozgi transfer oynasi yopilguniga qadar Garnacho boshqa jamoaga o‘tishi mumkin. Ayni paytda u Londonning Chelsi klubiga o‘tishni xohlamoqda.

Ma’lumotlarga ko‘ra, hozircha Chelsi klubi Garnacho transferi bo‘yicha Manchester Yunayted bilan muzokaralar boshlamagan. Bu transfer tez orada amalga oshishi kutilmayapti.

Chunki Chelsi hozirda asosan o‘z tarkibini qisqartirish va Xavi Simonsni sotib olish ishlariga e’tibor qaratmoqda. Garnachoning Chelsiga o‘tishi uchun asosiy omil futbolchining narxi bo‘lib qolmoqda.

Transfermarkt portali ma’lumotiga ko‘ra, Alejandro Garnachoning transfer bahosi 45 million yevroga teng. Shu sababli, Chelsi klubining keyingi harakatlari futbolchi narxiga va klubning transfer siyosatiga bog‘liq bo‘ladi.

Hozircha bu borada rasmiy takliflar yoki kelishuvlar mavjud emas.