Nyukasl Samu Agexo uchun 80 million yevro taklif qilishi mumkin
"Nyukasl" futbol klubi hujumchi Aleksandr Isakning ehtimoliy ketishi munosabati bilan unga munosib o‘rinbosar izlamoqda. Bu haqida Euro-football.ru xabar berdi.
Ma’lumotlarga ko‘ra, Isak "Liverpul" jamoasiga o‘tishi mumkin. Shu sabab, klub rahbariyati bir nechta nomzodlarni ko‘rib chiqmoqda.
Ular orasida portugaliyaning "Portu" jamoasida to‘p surayotgan Samu Agexoga ham e’tibor qaratilgan. Jurnalist Eduardo Burgosning xabar berishicha, "Portu" klubi 21 yoshli futbolchi uchun 80 million yevro talab qilmoqda.
Transfermarkt portali esa Samu Agexoni 50 million yevroga baholagan. Samu Agexo o‘tgan yilning avgust oyida Madridning "Atletiko" klubidan "Portu"ga o‘tgan edi.
O‘tgan mavsum davomida u 45 ta o‘yinda maydonga tushib, 27 ta gol urdi va 3 ta golli uzatma amalga oshirdi. "Nyukasl" uchun asosiy maqsadlardan biri Germaniyaning "RB Leyptsig" klubi hujumchisi Benyamin Sheshkoni ham transfer qilish hisoblanadi.
Klub rahbariyati yangi futbolchilar tanlovida ehtiyotkorlik bilan harakat qilmoqda va jamoaning hujum chizig‘ini kuchaytirish ustida ishlamoqda. Shu bilan birga, "Nyukasl" o‘z oldiga yuqori natijalarga erishish va kelasi mavsumda kuchli jamoa shakllantirishni maqsad qilgan.
