"Liverpul" hujumchisi Muhammad Salah kelajakdagi faoliyati borasida o‘z qarorini qabul qildi. Bu haqida Euro-football.ru xabar berdi.
Ma’lum bo‘lishicha, 33 yoshli misrlik futbolchi 2026 yil yozida mersisayd klubi safini tark etishni rejalashtirmoqda. Taxminlarga ko‘ra, Salah bir yildan so‘ng faoliyatini Saudiya Arabistonida davom ettirishi mumkin.
Bu transferdan "Liverpul" klubi yaxshi daromad olishi kutilmoqda. Muhammad Salah 2024-2025 yilgi mavsumda o‘zining yorqin o‘yinlari bilan ajralib turdi.
U barcha musobaqalarda jami 52 o‘yinda maydonga tushib, 34 ta gol urdi va 23 marotaba jamoadoshlariga golli pas berdi. Salahning muvaffaqiyatli o‘yinlari unga "Liverpul" bilan shartnomasini 2027 yilning o‘rtalarigacha uzaytirish imkonini berdi.
Mutaxassislarning baholashicha, Transfermarkt portali Muhammad Salahning qiymatini 50 million yevroga teng deb belgilagan. Shu tariqa, Salahning faoliyati va kelajagi futbol jamoatchiligi e’tiborida bo‘lib qolmoqda.
