Madridning “Real” jamoasida hujumkor yarim himoyachi sifatida to‘p surayotgan Arda Gyuler yangi bosh murabbiy Xabi Alonso qo‘l ostida ilk oylaridanoq o‘zini faol va ijobiy tomondan ko‘rsata oldi. Bu haqida Euro-football.ru xabar berdi.
U 20 yoshda bo‘lishiga qaramay, Klublar o‘rtasidagi jahon chempionatida “Real”ning yarim finalgacha yetib borishida muhim rol o‘ynadi. Biroq uning yutuqlari faqat shu bilan cheklanmaydi.
Jurnalist Ruben Martinning ma’lumotiga ko‘ra, “Real” klubi rahbariyati Arda Gyulerning jismoniy tayyorgarlik darajasidan juda mamnun. Klub vakillari, shuningdek, yosh futbolchining mashg‘ulotlarga va o‘yinga bo‘lgan mas’uliyatli yondashuvini ham yuqori baholashmoqda.
Gyuler mavsumoldi tayyorgarlik davrida o‘zini intizomli va fidokor sportchi sifatida ko‘rsatdi. 2024/25 yilgi mavsumda turkiyalik futbolchi Madrid jamoasi tarkibida barcha musobaqalarda 49 ta uchrashuvda ishtirok etdi.
Ushbu o‘yinlarda u 6 ta gol urdi va 11 ta golli uzatma amalga oshirdi. Bu natijalar Arda Gyulerning “Real” uchun muhim o‘yinchilardan biriga aylanganini ko‘rsatadi.
Klub rahbariyati va murabbiylar shtabi uning rivojlanishidan va o‘yinga bo‘lgan yondashuvidan katta umid qilmoqda.
