Kozlov: "Orenburg" ustidan og‘ir g‘alaba qozondik
"Krasnodar" jamoasi yarim himoyachisi Danila Kozlov "Orenburg" ustidan qozonilgan g‘alabadan so‘ng o‘z fikrlari bilan o‘rtoqlashdi. Bu haqida Euro-football.ru xabar berdi.
Rossiya chempionatining to‘rtinchi turi doirasidagi uchrashuv 1:0 hisobida yakunlandi. Kozlovning so‘zlariga ko‘ra, o‘yin juda og‘ir kechdi va maydonda ko‘plab kurashlar bo‘ldi.
Uning aytishicha, gol urish bir muddat imkonsiz bo‘lib turgan bo‘lsa-da, so‘nggi daqiqalarda kiritilgan gol hal qiluvchi bo‘ldi. "Muhimi, biz g‘alaba qozondik," — deya ta’kidladi futbolchi.
Danila Kozlov ushbu uchrashuvda asosiy tarkibda maydonga tushmadi, biroq 73-daqiqada zaxiradan o‘yinga qo‘shildi. Oradan ikki daqiqa o‘tib, Murad Musayev boshchiligidagi jamoa g‘alaba keltirgan golni urdi.
Keyingi turda "Krasnodar" o‘z maydonida "Sochi" jamoasiga qarshi bahs olib boradi. Uchrashuv 17-avgust kuni bo‘lib o‘tadi va boshlanish vaqti Moskva vaqti bilan 20:30 ga belgilangan.
