«Axmat» g‘alabadan so‘ng intizomiy jazoga duchor bo‘lishi mumkin

Rossiya futbol ittifoqi intizomiy qo‘mitasi yaqinda bo‘lib o‘tgan Rossiya oliy ligasi to‘rtinchi turi doirasidagi «Axmat» va «Zenit» jamoalari o‘rtasidagi uchrashuv natijalari bo‘yicha «Axmat» klubiga nisbatan intizomiy choralar ko‘rishi mumkin. Bu haqida Euro-football.ru xabar berdi.

Bu haqda intizomiy qo‘mita raisi Artur Grigoryants ma’lum qildi. Uning so‘zlariga ko‘ra, «Axmat» klubi o‘yin davomida stadiondagi ovozli e’lonlar tizimidan jamoani qo‘llab-quvvatlash uchun foydalangan.

Bu esa musobaqa nizomiga zid hisoblanadi. Mazkur holat yuzasidan qo‘mitada muhokama o‘tkaziladi va natijaga ko‘ra tegishli qaror qabul qilinadi.

Ma’lumot uchun, «Axmat» jamoasi bosh murabbiy Stanislav Cherchesov boshchiligida Sankt-Peterburgning «Zenit» jamoasini 1:0 hisobida mag‘lub etdi. Ushbu g‘alabadan so‘ng, Grozniy klubi uch ochko bilan Rossiya oliy ligasi turnir jadvalida 12-o‘rinni egallab turibdi.

Hozirda klubning keyingi taqdiri intizomiy qo‘mita qaroriga bog‘liq bo‘ladi.