Xoylun Manchester Yunaytedda qolishni istamoqda
Manchester Yunayted hujumchisi Rasmus Xoylun o‘z kelajagi borasida hali aniq qarorga kelgani yo‘q. Bu haqida Euro-football.ru xabar berdi.
Yaqinda daniyalik futbolchi Milan jamoasiga o‘tishga rozilik berdi, biroq oradan ko‘p vaqt o‘tmay, o‘z fikrini o‘zgartirdi. Goal nashrining xabariga ko‘ra, Xoylun Manchester Yunayted asosiy tarkibidan o‘rin olish va yangi hujumchi Benjamin Sheshko bilan raqobatlashishni istamoqda.
Avvalroq, daniyalik futbolchi Milan klubiga o‘tishga rozi bo‘lgandi, chunki Manchester Yunayted bosh murabbiyi Ruben Amorim kelasi mavsumda unga ishonch bildirmasligini ma’lum qilgan edi. Milan sport direktori Igli Tare esa Angliyada yana bir necha kun qolib, Xoylun bilan shartnoma imzolashga ko‘ndirishga harakat qilmoqda.
O‘tgan mavsumda Rasmus Xoylun Manchester Yunayted safida 52 ta o‘yinda maydonga tushib, 10 ta gol urdi va 4 ta golli uzatma berdi. Hozirda futbolchining qaysi jamoada faoliyatini davom ettirishi noma’lumligicha qolmoqda.
Shu sababli, uning kelajagi borasidagi savollar ochiq qolmoqda. Klub va futbolchi o‘rtasidagi muzokaralar davom etmoqda.
