Madridning "Real" jamoasi chap qanot himoyachisi Alvaro Karreras jamoa safida ilk bor maydonga tushganidan so‘ng o‘z fikrlarini bildirdi. Bu haqida Euro-football.ru xabar berdi.
Uning norasmiy debyuti Avstriyaning "Tirol" klubi bilan o‘rtoqlik uchrashuvida bo‘lib o‘tdi. Ushbu uchrashuvda "Real" 4:0 hisobida g‘alaba qozondi.
Yangi futbolchi asosiy tarkibda maydonga tushdi va 63 daqiqa davomida o‘ynadi. Alvaro Karreras intervyusida "Real" jamoasining futbolkasini kiyish men uchun katta sharaf ekanini ta’kidladi.
U jamoada uni yaxshi kutib olishganini, hech qanday muammo yo‘qligini, mavsumga jiddiy tayyorgarlik ko‘rishda davom etishi zarurligini aytdi. Futbolchi uchun o‘rtoqlik uchrashuvi yoki rasmiy bahs bo‘lishidan qat’i nazar, har bir o‘yin muhimligini qayd etdi.
U har doim g‘alabaga intilish va o‘z ustida ishlash lozimligini ta’kidladi. Shuningdek, Karreras murabbiy talablariga moslashayotganini, jamoada qanday o‘ynash kerakligi haqida aniq tasavvur borligini, eng muhimi esa har doim g‘alaba qozonish ekanini bildirdi.
Ma’lumot uchun, "Real" joriy yilning iyul oyida Alvaro Karrerasni Portugaliyaning "Benfika" klubidan 50 million yevro evaziga xarid qilgan edi.
