Yevropa futbolining eng so‘nggi transfer hujjatlarida yangi guldurrak: “Manchester Siti” va “Bavariya” klublari Italiya terma jamoasi posboni Janluiji Donnarumma uchun transfer poygasiga qo‘shildi.
Ederson ketsa, “Siti”ga yangi eshik ochiladi
“Manchester Siti” allaqachon asosiy darvozabon Edersonning klubdan ketish ehtimoliga tayyorgarlik ko‘ra boshlagan. Braziliyalik posbon bir necha mavsumdan beri jamoada mustahkam o‘ringa ega bo‘lsa-da, oxirgi paytlarda PSJ va Saudiya klublariga qiziqish bildirmoqda.
Pep Gvardiola esa himoya chizig‘idagi barqarorlikni saqlab qolish maqsadida jahon darajasidagi yangi posbon qidirishni boshladi va ko‘z o‘ngida – Donnarumma.
Donnarumma PSJdan ketishga moyilmi?
“Football Italia” nashri xabariga ko‘ra, Janluiji Donnarummaning Parijdagi kelajagi noaniq. Uning PSJ bilan amaldagi shartnomasi yana bir mavsum davom etadi, ammo italiyalik posbon yangi kelishuv tuzishga hozircha shoshilmayapti.
Bu holatdan foydalanish niyatida bo‘lgan A Seriyaning ikki giganti — “Yuventus” va “Inter” Donnarummani Italiyaga qaytarishni ko‘zlamoqda. Ammo kutilmagan raqobatchi sifatida “Manchester Siti” ham transfer kurashiga qo‘shildi.
Myunxenda ham posbon kerakmi?
Boshqa bir top-klub — “Bavariya” ham Janluiji Donnarummani so‘nggi oylarda diqqat bilan kuzatmoqda. Myunxenliklar Manuel Noyerning yoshi va jarohatlarini inobatga olgan holda, uning munosib vorisini izlashni boshlagan.
“Siti” moliyaviy kurashda oldinmi?
Angliya chempionlari o‘zining moliyaviy ustunligi bilan Donnarummani Italiyaga qaytishdan qaytarishi va Premer-ligada to‘p surishga ko‘ndirishi mumkin. “Siti” uning uchun mo‘may maosh va katta musobaqalarda muntazam ishtirok taklif etishga tayyor.
Zamin.uz tahririyatidan:
Golkiper pozitsiyasi jamoa muvaffaqiyatining asosiy poydevorlaridan biri. Donnarummaning keyingi tanlovi nafaqat o‘zi, balki unga da’vogar klublar uchun ham strategik ahamiyatga ega. Siz uni qayerda ko‘rishni xohlar edingiz – Angliyadami, Bundesligadami yoki yana A Seriyada?
