Angliya futbolidagi eng nufuzli yarimhimoyachilardan biri — Kevin de Bryuyne mavsum yakunlanishi bilan “Manchester Siti” safini tark etishini ma’lum qildi. Belgiya terma jamoasi sardori bo‘lgan 33 yoshli futbolchining klub bilan tuzgan shartnomasi yozda o‘z nihoyasiga yetadi va u erkin agent maqomini oladi.
Saudiya va MLS klublari harakatda
De Bryuyne uchun asosiy da’vogarlar sifatida Saudiya Arabistonining “An-Nasr” klubi va AQSHdagi “Inter Mayami” jamoasi ko‘rsatilmoqda. Mahalliy manbalarga ko‘ra, har ikki klub futbolchini rekord maosh va markaziy rol bilan o‘z safiga jalb etishni istamoqda.
“Ronaldu bilan o‘ynashni istayman”
Belgiyalik mahoratli pleymeyker intervyusida kim bilan o‘ynashni afzal ko‘rishini ham ochiq aytdi:
“Men Ronaldu bilan bir klubda to‘p surishni xohlardim. U hujumchi sifatida haqiqatan ham mukammal. Uni maydonda to‘p bilan ta’minlash orqali ko‘pgina g‘alabalarga hissa qo‘shish mumkin”, — dedi Kevin jurnalistlarga.
Bunday bayonot futbolchi Saudiya Arabistoniga, xususan, Ronaldu ishtirok etayotgan “An-Nasr” klubiga ko‘proq moyilligini anglatishi mumkin.
De Bryuyne – “Siti”dagi afsona
Kevin de Bryuyne 2015 yildan beri “Manchester Siti” sharafini himoya qilmoqda. Bu vaqt mobaynida u jamoa bilan birga:
- 5 marta APL chempionligini,
- 2 marta Angliya Kubogini,
- 5 marta Liga Kubogini,
- 1 marta Chempionlar Ligasini,
- 1 marta Klublar o‘rtasida Jahon chempionligini qo‘lga kiritdi.
U joriy mavsumda APLda 27 o‘yinda qatnashib, 4 ta gol va 7 ta assist bilan jamoa o‘yinidagi muhim figura sifatida qolmoqda.
Zamin.uz tahririyatidan:
De Bryuyne kabi aqlli, muvozanatli va tajribali futbolchining yangi bosqichdagi tanlovi futbol olamida katta qiziqish uyg‘otmoqda. Uning qarorini kelajakda qaysi chempionat muvaffaqiyat bilan qarshi oladi — buni vaqt ko‘rsatadi. Siz Kevin uchun qayerdagi futbol atmosferasini munosib deb hisoblaysiz?
