“Barselona”ning braziliyalik yulduzi Rafinyaga o‘zi orzu qilgan klubga o‘tishidan oldin ham dunyoning eng kuchli chempionatlaridan jiddiy takliflar bo‘lgan. Bu haqda futbolchi jurnalistlar bilan bo‘lib o‘tgan suhbatda samimiy iqror etdi.
Jurnalist tomonidan berilgan savolda: “Barsa”ga kelishingizdan avval ham har yili Angliya Premyer-ligasi va Saudiya Arabistonining katta klublaridan jiddiy va yuqori darajadagi takliflar olib turganmisiz?" deb so‘ralgandi. Bunga javoban Rafinya: «Ha, bu haqiqat. Bunday jiddiy takliflar olishim mening darajam yuqori ekanini ko‘rsatadi. Agar futbolchi yuqori saviyada o‘ynamasa, APLning katta klublari yoki boshqa dunyoga mashhur jamoalar unga taklif bermaydi. Lekin men uchun bunday takliflarni qabul qilish emas, balki “Barselona” futbolchisi bo‘lish muhimroq edi», – deya taʼkidladi.
Rafinya “Barselona”ga kelishi tasodifiy qaror emasligini, aksincha, bolalikdan bu klubni yuragidan yaxshi ko‘rib kelganligini aytdi. U yoshligidan “Barselona”ning o‘yinlarini muntazam kuzatib borgan, o‘z vatandoshlari bo‘lgan Ronaldinyo va Neymarning ajoyib o‘yinlarini zavq bilan tomosha qilgan. Shuningdek, futbolchi “Barsa”ning boy tarixi, ko‘plab g‘alabalari, fantastik muhiti va muxlislarining jo‘shqinligidan doim taʼsirlanganini taʼkidlab o‘tdi.
«Men uchun “Barselona”da o‘ynash bolalikdan boshlab orzu edi. Bu shaharda va klubning afsonaviy stadioni Kamp Nouda avval ham bo‘lganman va har safar shu muhitga muhabbatim yana-da ortaverdi. Orzularimning eng kattasi — bu klubda o‘ynash va o‘z nomimni uning afsonaviy tarixi sahifalariga yozish edi», – deydi futbolchi.
Rafinya boshqa mashhur klublarning takliflaridan voz kechganining sababini ham aytib o‘tdi: «Har bir futbolchiga turli takliflar bo‘ladi, lekin men uchun asosiysi pul yoki boshqa manfaatlar emas, orzularimni amalga oshirish edi. “Barselona”ning libosini kiyish, o‘z muxlislarim oldida maydonga chiqish va dunyodagi eng yaxshi futbolchilar bilan birga o‘ynash — bu mening butun hayotimda intilib kelgan maqsadim edi».
Shu bilan birga, Rafinya bu qarorni qabul qilish oson bo‘lmaganini ham qayd etdi: «Bu qaror katta jasorat talab qilardi, chunki men boshqa katta klublarda ham yaxshi shartnomalar tuzishim mumkin edi. Ammo men qalbimga quloq tutdim va “Barsa”ni tanladim. Bu tanlovimdan afsuslanmayman va har kuni bu jamoada ekanligimdan zavqlanaman».
Bugungi kunda “Barselona”ning asosiy futbolchilaridan biriga aylangan Rafinya o‘z o‘yinlari bilan muxlislarni quvontirishda davom etmoqda. Uning bu samimiy iqrori jamoa muxlislarini yana-da ko‘proq hayajonlantirib, klubga bo‘lgan muhabbatni yana-da oshirgani aniq.
