Kevin De Bryuyne "Napoli"ga yaqin: Italiya klubi bilan muzokaralar yakuniga yetmoqda
"Manchester Siti"ning afsonaviy yarim himoyachisi Kevin De Bryuyne faoliyatida yangi sahifa ochish arafasida turibdi. 10 yillik muvaffaqiyatli faoliyatdan so‘ng, u "Napoli" bilan shartnoma imzolashga yaqinlashdi. Bu haqda klub prezidenti Aurelio De Laurentis ma’lum qildi.
De Laurentisning so‘zlariga ko‘ra, De Bryuyne va uning oilasi bilan videomuloqot bo‘lib o‘tgan va u Neapolda uy sotib olgan. "Biz jiddiy odamlarmiz. Hozircha hech narsa rasmiy emas, ammo menimcha, u allaqachon go‘zal uy sotib olgan", — dedi De Laurentis.
"Napoli" sport direktori Jovanni Manna ham muzokaralar yakuniga yaqin ekanini tasdiqladi. Uning so‘zlariga ko‘ra, De Bryuyne bilan shartnoma 2027 yilgacha tuzilishi kutilmoqda.
De Bryuyne "Manchester Siti"da 2015 yildan beri faoliyat yuritib, jamoa bilan 6 marta Premer-liga chempionligini va 2023 yilda Chempionlar ligasini qo‘lga kiritgan. Uning klub bilan shartnomasi 2025 yil 30 iyunda yakunlanadi.
"Napoli"ning Chempionlar ligasiga qaytishi va murabbiy Antonio Konte bilan hamkorlik qilish imkoniyati De Bryuyneni Italiya klubini tanlashga undagan. Uning "Napoli"ga o‘tishi jamoaning Yevropa futbolidagi nufuzini yanada oshirishga xizmat qilishi mumkin.
