Fransuz yarimhimoyachisi Pol Pogba «Monako» klubi bilan shartnoma imzolagan paytda ko‘z yoshlarini qanday sababdan to‘kkanini tushuntirdi. Bu haqida Euro-football.ru xabar berdi.
Futbolchi shartnoma qo‘l qo‘yishdan oldin yig‘lab yuborgan. «Men yig‘layotganimni juda kam ko‘rish mumkin, shuning uchun umid qilamanki, sizga ta’sir qildi.
Mening ongimda ko‘plab tasvirlar paydo bo‘ldi. Biz doping bilan bog‘liq tarixni, jarohatimni bilamiz… bularning hammasi shartnoma imzolash vaqtida yodimga tushdi va men o‘z his-tuyg‘ularimni nazorat qila olmadim», deya futbolchining so‘zlarini Get French Football News keltirmoqda.
U shuningdek, bu ko‘z yoshlar quvonchdan ekanini va o‘sha lahza uning hayotidagi juda muhim voqea bo‘lganini bildirdi. Eslatib o‘tamiz, klub Pogba bilan ikki yillik shartnoma tuzdi.
Fransuz futbolchisi 2023 yildan beri maydonga chiqmagan, u antidoping qoidalarini buzgani uchun 18 oyga diskvalifikatsiya qilingan edi. Uning oxirgi klubi Turinning «Yuventus» jamoasi bo‘lgan.
Fransiya terma jamoasi safida Pogba 2018 yilgi jahon chempionligi sovrini sohibidir.
