Federiko Valverde o‘tgan mavsumda maydonda eng ko‘p o‘ynagan futbolchi sifatida jahon rekordini o‘rnatdi. Bu haqida Euro-football.ru xabar berdi.
Marca nashri xabariga ko‘ra, u 72 ta o‘yinda maydonga tushib, jami 6116 daqiqa o‘ynadi. Valverde «Real» klubi va Urugvay milliy terma jamoasi sharafini himoya qilgan.
Shuningdek, eng ko‘p o‘ynagan futbolchilar qatorida Portugaliya terma jamoasi va «Manchester Yunayted» klubi yarim himoyachisi Bruno Fernandesh bor. U 66 o‘yinda maydonga tushib, jami 5796 daqiqa o‘ynadi.
«Milan» klubi va Fransiya milliy jamoasi darvozaboni Mayk Menyan esa 63 o‘yinda maydonga tushib, 5624 daqiqa davomida maydonda bo‘ldi. Top o‘nlikka shuningdek, «Bavariya»dan Yozua Kimmix, «Manchester Siti»dan Yoshko Gvardiol, «Arsenal»dan David Rayya, «PSJ»dan Ashraf Hakimi, «Chelsi»dan Mark Kukurelya, «Atletiko»dan Yan Oblak va «Liverpul»dan Virgil van Deyk kiritilgan.
Ularning barchasi o‘tgan mavsumda 5000 dan ortiq daqiqa o‘ynashga muvaffaq bo‘ldi. Bu futbolchilar o‘z jamoalari uchun muhim o‘yinchilar hisoblanadi va maydondagi faoliyatlari bilan ajralib turadi.
