Ukrainada so‘nggi 10 yil ichida ilk bor seriyaviy qotilga sud hukmi chiqarildi. Bu jinoyat ishi bo‘yicha Ukraina Milliy politsiyasi tergovni yakunladi va aybdor sifatida O‘zbekiston fuqarosi aniqlangani ma’lum qilindi, deb UPL.uz xabar berdi.
Tergov ma’lumotlariga ko‘ra, 2018 yildan 2024 yilgacha u 11 kishini — 8 erkak va 3 ayolni vahshiylarcha o‘ldirgan. U qurbonlar bilan tanishib, ishonchlarini qozongan, ko‘pincha spirtli ichimliklar ichilgan holda vaqt o‘tkazgan. Qurbonlar hushyorlikni yo‘qotganida, u bo‘g‘ish yoki tosh bilan urish orqali ularni o‘ldirgan. So‘ng ularning pullari, taqinchoqlari va qimmatbaho buyumlarini o‘marib ketgan.
Eng dahshatli voqealardan biri Kiyevning Goloseyev tumanida sodir bo‘lgan — gul do‘koni xodimasi 34 marta pichoqlangan. Ushbu jinoyat orqali tergovchilar maniyak iziga tushishgan va boshqa jinoyatlarni ham fosh etishgan.
Sud qaroriga ko‘ra, O‘zbekiston fuqarosi umrbod qamoq jazosiga hukm qilindi.
