Filippinda yirik avtohalokat: Haydovchining uyqusi o‘n kishining umriga zomin bo‘ldi!
Filippinning Tarlak viloyatida joylashgan Subik-Klark-Tarlak tezkor avtomagistralida ayanchli yo‘l-transport hodisasi yuz berdi. Mazkur halokat natijasida to‘rt nafari bolalar bo‘lgan o‘n kishi hayotdan ko‘z yumdi. Bu haqda Tarlak politsiya boshqarmasi rahbari Romel Santos ommaviy axborot vositalariga ma’lum qildi.
Hodisa qanday yuz bergani haqida berilgan ma’lumotlarga ko‘ra, avtobus haydovchisi pulli yo‘ldan o‘tish uchun to‘lovni amalga oshirayotgan furgonga qattiq zarba bilan urilgan. Kuchli zarba ta’sirida furgon navbatda turgan boshqa avtomobillarga borib urilib, zanjirsimon tarzda bir nechta transport vositasi jiddiy jarohatlangan.
Falokat oqibatida qurbon bo‘lganlarning jasadlari o‘z avtomobillari ichida qisilib qolgan. Hodisa joyiga yetib kelgan maxsus xizmatlar va qutqaruvchilar halok bo‘lganlarning jasadlarini transport vositalaridan chiqarish uchun uzoq vaqt harakat qilishga majbur bo‘lgan.
Politsiya rahbari Santosning aytishicha, avtobus haydovchisi hibsga olingan va dastlabki so‘roq jarayonida u rul ortida uxlab qolganini tan olgan. Shuningdek, avtobusda bo‘lgan yo‘lovchilar yengil jarohatlar bilan omon qolishgan.
Halokatga sababchi avtobus haydovchisi Solid North Transit Inc kompaniyasida ishlaganligi aniqlangan. Voqea yuzasidan mamlakatning transport vaziri Vins Dizon mazkur kompaniyaning Filippindagi barcha faoliyatini zudlik bilan to‘xtatish to‘g‘risida ko‘rsatma berdi. Shuningdek, tergov ishlari davom ettirilmoqda.
