Donald Tramp prezidentlik muddati haqida yakuniy qarorini aytdi
AQSHning 45-prezidenti Donald Tramp Oq uyda faqatgina ikki muddat faoliyat yuritish niyati borligini ma’lum qildi. U bu haqda NBC telekanali jurnalistlari bilan bo‘lgan intervyuda aytib o‘tdi.
So‘nggi paytlarda ommaviy axborot vositalarida va ijtimoiy tarmoqlarda Trampning uchinchi muddatga nomzod bo‘lishi mumkinligi haqida turli taxminlar paydo bo‘lgan edi. Ayniqsa, aprel oyida prezident bilan bog‘liq bo‘lgan Trump Organization kompaniyasi "Trump 2028" yozuvi tushirilgan maxsus qizil kepkalarni sotuvga chiqarganidan keyin ushbu mish-mishlar yanada kuchaygandi.
Biroq prezident o‘zining uchinchi muddatga nomzod bo‘lish ehtimolini rad qildi. «Men sakkiz yil prezident bo‘laman, ikki muddat xizmat qilaman. Men uchun bu doimo juda muhim bo‘lgan. Ko‘p odamlar uchinchi muddatga nomzod bo‘lishimni so‘rashmoqda, bu iltimoslarning soni ilgari hech qachon bunchalik ko‘p bo‘lmagan. Ammo men bilamanki, bu qonunan mumkin emas va men buni qilmayman», — dedi Tramp.
Tramp o‘z suhbatida prezidentlikdagi qolgan muddatini «to‘rt ajoyib yil» deb atab, uning yakunida hokimiyatni munosib shaxsga, ayniqsa «buyuk respublikachi»ga topshirish rejasi borligini ta’kidladi.
Shu bilan birga, "Make America Great Again" («Amerikani yana buyuk qilamiz») nomli siyosiy harakatning kelajagi haqida savolga javob berar ekan, Tramp harakatni davom ettirishi mumkin bo‘lgan ko‘plab iqtidorli nomzodlar mavjudligini bildirdi. U AQSH davlat kotibi Marko Rubio va mamlakat vitse-prezidenti Jey Di Vens kabi yetakchi siyosiy shaxslarni ehtimoliy vorislar sifatida nomladi.
«Hozir shu yerda o‘tirgan holimda, bu harakatni boshqarishi mumkin bo‘lgan 10, 15 yoki hatto 20 kishi haqida gapirishim mumkin», deya ta’rif berdi Tramp. U aniq nomlarni oshkor etishdan o‘zini tiyib, kelajakda prezidentlik uchun respublikachilarning yangi avlodi paydo bo‘lishiga ishora qildi.
Ma’lumot o‘rnida, AQSH konstitutsiyasining 22-tuzatishiga binoan, bir shaxs ikki martadan ortiq prezident bo‘lib saylanishi mumkin emas. Uchinchi muddatga saylanish uchun Konstitutsiyaning ushbu moddasiga o‘zgartish kiritish kerak, bu esa siyosiy jihatdan o‘ta murakkab hisoblanadi.
Shunday qilib, Trampning ushbu bayonoti bilan u prezidentlikka nomzodlik qo‘yish haqidagi barcha savollarga aniqlik kiritdi va uning tarafdorlari uchun ham aniq signal yubordi. Bu bilan siyosatchi 2028 yilgi saylovlardagi o‘z ehtimoliy ishtirokini chekladi va kelajakdagi siyosiy manzarani yangicha shakllanishiga zamin yaratdi.
