Germaniyada yashovchi yosh yigit Leon Otremba o‘zining past bo‘yi tufayli ko‘p yillar davomida kamsitilganlikni his qilgan. Bu haqida Zamin.uz xabar berdi.
Uning bo‘yi 171 santimetr bo‘lib, bu unga hayotda o‘zini erkin his qilishga to‘sqinlik qilgan. U ko‘p marotaba o‘zini boshqalar bilan taqqoslab, o‘zini past bo‘yli deb hisoblagan va bu ruhiy tushkunlikka olib kelgan.
Ushbu ichki norozilik va ruhiy qiynoqlar uni radikal qaror qabul qilishga majbur qilgan — Leon oyoqlarini jarrohlik yo‘li bilan sun’iy ravishda uzaytirishga rozi bo‘lgan. Jarayon ikki yil davom etib, natijada uning bo‘yi 24 santimetrga oshgan va hozirda 195 santimetrga yetgan.
Birinchi operatsiya 2023 yilda o‘tkazilgan bo‘lib, shifokorlar metall sterjenlar va tashqi qurilmalar yordamida son suyaklarini kunlik 1 millimetrdan cho‘zib, 10 santimetrga uzaytirishgan. Leon muntazam tibbiy nazoratdan o‘tib, infeksiya xavfini kamaytirishga harakat qilgan.
Ikkinchi murakkab jarrohlik amaliyoti 2025 yil boshida o‘tkazilgan. Bu safar boldir suyaklari ichki mexanizm — klik tizimi yordamida uzaytirilgan.
Leonning so‘zlariga ko‘ra, ikkinchi jarayon avvalgidan kamroq og‘riqli bo‘lgan, ammo tiklanish jarayoni ancha uzoq davom etgan. U hatto qaytadan yurishni o‘rganishga majbur bo‘lgan.
Natijada yigit o‘z maqsadiga erishgan bo‘lsa-da, bu jarayon unga doimiy jismoniy og‘riq va noqulayliklarni keltirib chiqargan. Leon tanasida doimiy og‘riq borligini va bu uning kundalik hayotiga salbiy ta’sir ko‘rsatishini aytadi.
Ortoped shifokorlar bunday jarrohlik amaliyotlariga nisbatan ogohlantiradi. Masalan, mutaxassis Luchano Millerning fikricha, oyoq uzaytirish operatsiyalari faqat tibbiy zarurat, ya’ni tug‘ma nuqsonlar yoki jarohatlar holatida amalga oshirilishi kerak.
U bunday sun’iy aralashuvlar inson tanasining biomexanik muvozanatini buzib, mushak va to‘qimalarda salbiy o‘zgarishlarga olib kelishini ta’kidlaydi. Shuning uchun har qanday jismoniy kamchilikni jarrohlik yo‘li bilan tuzatishdan oldin uning oqibatlarini yaxshilab o‘ylab ko‘rish zarur.
Leonning hikoyasi esa inson o‘zgarish orqali baxtga erishmoqchi bo‘lsa-da, tabiat qonunlariga qarshi kurashish qimmatga tushishini ko‘rsatadi.
