O‘zbekiston Respublikasida qiynoqlarni oldini olish va hibsga olingan shaxslarning huquqlarini ta’minlash maqsadida muhim o‘zgarishlar joriy qilindi. Bu haqida Upl.uz xabar berdi.
2025 yil 26 iyunda qabul qilingan ZRU-1072-sonli qonunga muvofiq, Jinoyat ishlari bo‘yicha hibsga olish tartibi to‘g‘risidagi qonunga sezilarli qo‘shimchalar kiritildi. Bu haqda O‘zbekiston Respublikasi Adliya vazirligi matbuot xizmati ma’lum qildi.
Yangi qo‘shimchaga ko‘ra, hibsga olingan shaxslar tergov izolyatoriga joylashtirilishidan oldin, izolyatorda majburiy tibbiy ko‘rikdan o‘tkaziladi. Ko‘rik ikki soat ichida, ya’ni shaxs izolyatorga keltirilganidan so‘ng imkon qadar tez bajarilishi lozim.
Bu tartib jismoniy shikastlanishlarni o‘z vaqtida aniqlash uchun muhim ahamiyatga ega. Shuningdek, tibbiy ko‘rik vaqtida advokatning ishtirok etishi mumkinligi belgilandi.
Agar hibsga olingan shaxs rozilik bildirsa, uning advokati ko‘rik jarayonida qatnashish huquqiga ega bo‘ladi. Bu esa jarayonning oshkoraligi va ishonchliligini oshiradi.
Majburiy tibbiy ko‘rik yakunida belgilangan shakldagi tibbiy ma’lumotnoma rasmiylashtiriladi. Agar ko‘rik paytida shaxsning tanasida jarohat, shikast yoki yara aniqlansa, ular qonunda belgilangan tartibda qayd etiladi, hibsga olinganga ma’lum qilinadi va bu haqda ma’lumot darhol prokurorga yuboriladi.
Ushbu chora-tadbirlar inson huquqlarini himoya qilish va qiynoqlarga yo‘l qo‘ymaslikda muhim qadam hisoblanadi.
👍 0❤️ 0😂 0😢 0😡 0
