O‘zbekiston va Qozog‘iston sayg‘oqlarni birgalikda saqlaydi
O‘zbekiston Ekologiya, atrof-muhitni muhofaza qilish va iqlim o‘zgarishi vazirligi hamda Qozog‘iston Ekologiya va tabiiy resurslar vazirligi sayg‘oqlarni saqlab qolish bo‘yicha davlatlararo hamkorlikni tizimli ravishda rivojlantirmoqda. Bu haqida Zamin.uz xabar berdi.
Ushbu hamkorlik noyob va yo‘qolib ketish xavfi ostida turgan sayg‘oqlarni asrashga qaratilgan. Yaqin kelajakda O‘zbekiston va Qozog‘iston o‘rtasida sayg‘oqlarni muhofaza qilish bo‘yicha anglashuv memorandumi imzolanishi rejalashtirilmoqda.
Bu hujjat sayg‘oqlar sonini tiklash uchun kompleks dasturlarni amalga oshirishga asos bo‘ladi. Memorandum doirasida bir qator qo‘shma tadbirlar rejalashtirilgan.
Ular orasida sayg‘oqlarning an’anaviy ko‘chish yo‘nalishlarida erkin harakatlanishi va xavfsizligini ta’minlash maqsadida chegara bo‘ylab muhofaza etiluvchi hududlar hamda migratsion koridorlar tashkil etish, tabiiy yaylovlar, suv havzalari va ekotizimlarni tiklash, sayg‘oqlarni tabiatga qayta ko‘chirish dasturini ishlab chiqish kiradi. Shuningdek, ilmiy tadqiqotlar, monitoring va tajriba almashish yo‘lga qo‘yiladi.
Bu doirada qo‘shma ekspeditsiyalar, reydlar o‘tkazish, mutaxassislarni tayyorlash va populyatsiya bo‘yicha ma’lumotlarni almashish rejalashtirilgan. Hamkorlikning asosiy yo‘nalishlari transchegaraviy ekotizimlarda sayg‘oqlar soni, sog‘ligi va migratsiyasini kuzatish, yashash muhitini tiklash, arealning parchalanishini oldini olish, ilmiy, texnik va genetik ma’lumotlar almashish, sun’iy yo‘ldosh kuzatuvlari va veterinariya nazoratini joriy etishdan iborat.
Brakonerlikka qarshi kurashish, tabiatni muhofaza qilish choralarini kuchaytirish hamda aholi o‘rtasida tushuntirish-targ‘ibot ishlarini olib borish ham muhim vazifalardan biridir. Shu bilan birga, hisob usullarini muvofiqlashtirish, yagona ma’lumotlar bazasini yaratish va tabiatni muhofaza qilish dasturlarini amalga oshirish uchun xalqaro hamkorlarni jalb etish ham rejalashtirilgan.
Bu chora-tadbirlar sayg‘oqlarni saqlab qolish va ularning tabiiy muhitini tiklashda muhim ahamiyatga ega bo‘ladi.
