Samarqand aeroporti O‘ES aviatsiya markazi deb e’lon qilindi
2025-yil iyun oyi boshida Tehronda Iqtisodiy hamkorlik tashkiloti (O‘ES)ga a’zo davlatlar uchrashuvi bo‘lib o‘tdi. Unda O‘zbekistonning transport sohasini rivojlantirish bo‘yicha takliflari kiritilgan muhim hujjat — Tehron deklaratsiyasi qabul qilindi, deb UPL.uz xabar berdi.
Mazkur deklaratsiyadagi eng asosiy bandlardan biri Samarqand aeroportiga O‘ES aviatsiya hubligi maqomining berilishidir. Bu haqda O‘zbekiston Transport vazirligi ma’lum qildi. Shuningdek, deklaratsiyaga Toshkent tomonidan ilgari surilgan transport va bojxona jarayonlarini boshqarish uchun raqamli ofis yaratish tashabbusi ham kiritildi.
O‘ES 1985-yilda tashkil etilgan bo‘lib, asosiy maqsadi iqtisodiyot va logistika sohalarida davlatlararo hamkorlikni mustahkamlashdir. O‘zbekiston 1992-yildan buyon tashkilot a’zosi bo‘lib, mintaqaviy taraqqiyotga qaratilgan loyihalarda faol ishtirok etib kelmoqda.
Samarqand aeroportini O‘ES aviatsiya hubi sifatida rivojlantirish g‘oyasi ilgari ham muhokama qilingan, endilikda esa bu maqom rasmiylashtirildi. Bu aeroportning rolini oshirib, yo‘lovchi va yuk oqimini ko‘paytirishga xizmat qiladi.
Shuningdek, transport va bojxona tizimlarida raqamli boshqaruv ofisi tashkil etilishi orqali tovarlarning chegaradan o‘tishini soddalashtirish, tezlashtirish va shaffoflashtirish maqsad qilingan.
Tehron deklaratsiyasi transport sohasining turli jihatlarini o‘z ichiga olib, O‘ESga a’zo davlatlar o‘rtasidagi hamkorlikni mustahkamlash, logistika samaradorligini oshirish va mintaqaning iqtisodiy o‘sishiga xizmat qilishni ko‘zda tutadi.
1980-yillarda qurilgan Samarqand aeroporti 2022-yilda to‘liq rekonstruksiya qilinib, soatiga 800 yo‘lovchini qabul qilish quvvatiga ega bo‘ldi. Bu esa uni Markaziy Osiyodagi eng zamonaviy aeroportlardan biriga aylantirgan.
