Toshkentda erkak to‘y tashkil qilaman deb firibgarlik qildi
Toshkentda bir erkak fuqarolarga to‘y tashkil qilib berishni va’da qilib, ularning pullarini o‘zlashtirgani aniqlandi, deb xabar berdi shahar IIB matbuot xizmati.
Ma’lumotlarga ko‘ra, gumonlanuvchi to‘yxonalardan birida administrator bo‘lib ishlagan. U mijozlardan buyurtmalar qabul qilgan, sanalarni kelishgan, menyuni tuzishda yordam bergan va avans olgan. Biroq, to‘y kuni yetib kelgan mijozlar restoranda hech qanday tayyorgarlik yo‘qligini ko‘rgan. Erkak bir necha kishini 66,3 million so‘m va 7,4 ming dollar miqdorida chuv tushirishga muvaffaq bo‘lgan.
“Biz restoranga keldik, zalga kirsak – chiroq o‘chgan, stollar bo‘sh, hech narsa yo‘q. Hayratda qoldik. Allaqachon kech bo‘lib qolgandi, boshqa joyda to‘y tashkillashtirishning iloji yo‘q edi. Pul to‘laganmiz, lekin hech narsa yo‘q”, – deydi jabrlanuvchilardan biri.
Gumonlanuvchi esa zalni ijaraga olib, tadbirkorlik qilishni niyat qilganini ta’kidlagan. Shuningdek, u oldindan qarzlari bo‘lgani uchun odamlardan 15-20 million so‘m olganini va keyinchalik qaytarishni rejalashtirganini aytgan. Mazkur holat bo‘yicha Jinoyat kodeksining 168-moddasi (firibgarlik) bilan ish ochilgan va tergov harakatlari davom etmoqda.
Nodirbek
