Faxriy donorlar uchun yangi imtiyozlar joriy etildi
Oliy Majlis Senati donorlik harakatini qo‘llab-quvvatlash tizimini takomillashtirishga qaratilgan qonunni qabul qildi, deb xabar bermoqda parlament matbuot xizmati.
Yangi qonunga muvofiq, “Faxriy donor” ko‘krak nishoni bilan taqdirlangan fuqarolar bir martalik pul mukofoti olishadi. Endilikda ushbu mukofot miqdori 15 BHM (5,6 million so‘m) etib belgilandi. Avval bu miqdor 5 BHM (1,8 million so‘m) edi.
Faxriy donorlar o‘zlari uchun qulay vaqtda yillik mehnat ta’tiliga chiqishlari, shahar yo‘lovchi transportidan (marshrutka va liniyali taksilardan tashqari) bepul foydalanishlari va sanatoriy-kurort yo‘llanmalarini navbatsiz olishlari mumkin.
Shuningdek, mahalliy hokimiyat organlari aholida bepul donorlik madaniyatini shakllantirish, donorlik harakatini keng jamoatchilik ishtirokida rivojlantirish va donorlar uchun qulay sharoitlar yaratish bo‘yicha chora-tadbirlarni amalga oshiradi.
