Toshkent-Bo‘stonliq yo‘li velomarafon sabab yopiladi
Toshkent viloyatining ayrim ko‘chalarida 4-5 mart kunlari velosport musobaqalari o‘tkazilishi munosabati bilan transport harakati cheklanadi, deb xabar berdi poytaxt hokimiyati matbuot xizmati.
Bo‘stonliq tumanida yo‘l poygasi bo‘yicha sport ustasi unvoni uchun V. Iskandarov xotirasiga bag‘ishlangan musobaqalar o‘tkaziladi. Shu sababli quyidagi yo‘nalishlarda transport harakati vaqtincha to‘xtatiladi:
4-mart (10:00-14:00): D012 yo‘nalishining 34-km dan 54-km gacha (Bektemir-Chirchiq-G‘azalkent-Charvoq yo‘li);
5-mart (10:00-14:00): D012 yo‘nalishining 34-km dan 66-km gacha (Bektemir-Chirchiq-G‘azalkent-Charvoq yo‘li).
Bo‘stonliqqa yo‘lga chiqadigan haydovchilarga Chirchiq shahri, shuningdek, Koramanas va Qo‘shqo‘rg‘on mahallalari orqali muqobil yo‘nalishlardan foydalanish tavsiya etiladi.
