Miranchukning "Sion"dan ketishi tovon puli bandiga bog‘liq
“Sion” futbol klubi prezidenti Kristian Konstantin jamoa yarim himoyachisi Anton Miranchukning kelajakdagi faoliyati haqida o‘z fikrini bildirdi. Bu haqida Euro-football.ru xabar berdi.
Avvalroq, Anton Miranchuk xizmatlari Rossiya Premer-ligasining bir nechta klublariga taklif etilgani haqida xabarlar tarqalgan edi. Hozirda Miranchuk bo‘yicha Rossiya va Turkiya klublari bilan muzokaralar olib borilmoqda.
Antonning shartnomasida belgilangan tovon puli miqdori mavjud. Men Antonning klubda qolishini istardim, lekin uning kelajagi bo‘yicha yakuniy qarorni qabul qilmayman.
Barcha narsa shartnomadagi tovon puli bandiga bog‘liq. Agar bu band ishga tushsa, biz futbolchini jamoada ushlab qola olmaymiz, – deydi Kristian Konstantin Sport24 nashriga bergan intervyusida.
Anton Miranchuk 2024-yil sentabr oyida “Sion” futbolchisiga aylangan. U bunga qadar Rossiya Premer-ligasida Moskvaning “Lokomotiv” jamoasida o‘ynagan.
O‘tgan mavsumda Shveytsariya chempionatida Miranchuk 24 ta o‘yinda ishtirok etib, ikki gol urdi va uchta golli uzatma berdi. 29 yoshli futbolchi “Sion” klubiga o‘z hissasini qo‘shdi va jamoa natijalariga ijobiy ta’sir ko‘rsatdi.
