“Barselona” tarbiyalanuvchisi Adam Aznu hozirda Angliyaning “Everton” klubi safida o‘ynaydi. Bu haqida Euro-football.ru xabar berdi.
U o‘zining do‘sti va sobiq jamoadoshi Lamin Yamal haqida fikr bildirdi. Aznu ta’kidlashicha, Lamin Yamal ham xalqaro maydonda Marokash terma jamoasi safida o‘ynashi mumkin edi.
Biroq Yamal Ispaniya terma jamoasini tanladi. Adam Aznu bu borada shunday dedi: “Men Yamalni Marokash terma jamoasini tanlashga undamadim.
Unga bosim o‘tkazmadim, chunki u Ispaniya uchun o‘ynashini bilardim. Bu uning shaxsiy qarori.
Men unga ‘Men yuragim istagan jamoani tanlayman, sen ham o‘zing xohlagan yo‘lni tanla, men sening tanlovingga hurmat bilan qarayman’, dedim. Agar men uning o‘rnida bo‘lganimda, Marokash terma jamoasini tanlagan bo‘lardim.
Ha, agar men uning vaziyatida bo‘lganimda, o‘z fikrlarim va qarashlarim bilan Marokash terma jamoasi safida o‘ynashni xohlardim. Lekin bugungi kunda Lamin Yamal 17 yoshida Yevropa chempioni bo‘ldi”.
Eslatib o‘tamiz, Adam Aznu iyul oyining oxirida Germaniyaning “Bavariya” klubidan “Everton”ga o‘tdi. U Marokash terma jamoasi safida uchta o‘yin o‘tkazgan.
