Mashhur murabbiy Yuriy Syomin Rossiya terma jamoasining yaqin oradagi raqibi haqida o‘z fikrini bildirdi. Bu haqida Euro-football.ru xabar berdi.
4-sentabr kuni Valeriy Karpin boshchiligidagi jamoa Iordaniya terma jamoasiga qarshi o‘rtoqlik uchrashuvi o‘tkazadi. O‘yin qayerda bo‘lib o‘tishi haqida keyinroq e’lon qilinadi.
Syominning aytishicha, Iordaniya terma jamoasi oddiy yoki kuchsiz raqib emas. Ular jahon chempionatiga yo‘llanma olgan va ma’lum darajada kuchga ega.
Uning fikriga ko‘ra, bu o‘yin Rossiya terma jamoasi uchun yaxshi sinov bo‘ladi. Ma’lumot uchun, Iordaniya terma jamoasi joriy yil boshida ilk bor jahon chempionati yo‘llanmasini qo‘lga kiritdi.
Ular 2026-yilgi mundialda ilk marta qatnashadi. Shuni ham ta’kidlash kerakki, Rossiya terma jamoasi hozirda Yevropa va jahon futbol tashkilotlari sanksiyalari ostida.
Shu sababli, Valeriy Karpin boshchiligidagi jamoa hozircha faqat o‘rtoqlik uchrashuvlari o‘tkazishi mumkin. Bu sharoitda Iordaniyaga qarshi o‘yin jamoaning hozirgi holatini baholash uchun muhim sinov bo‘lib xizmat qiladi.
