"Real" jamoasi hujumchisi Rodriqo bosh murabbiy Xabi Alonsoning oldiga uchrashgan, biroq ushbu uchrashuvdan so‘ng transfer uchun ariza topshirmagan. Bu haqida Euro-football.ru xabar berdi.
Bu haqda jurnalist Ben Jeykobs o‘zining ijtimoiy tarmoqlardagi sahifasida ma’lum qilgan. Avvalroq matbuotda Rodriqo kelajagi borasida qaror qabul qilish uchun Alonso bilan suhbatlashishi, aynan shu uchrashuvdan keyin futbolchining yangi mavsumdagi imkoniyatlari haqida ma’lumot olishi haqida xabarlar chiqqan edi.
Jeykobsning yozishicha, seshanba tongiga qadar "Real" klubi Rodriqo bo‘yicha hech qanday rasmiy taklif olmagan. "Tottenhem" klubi tomonidan Rodriqoga qiziqish bildirildi degan ma’lumotlar haqiqatga mos kelmaydi.
Madrid klubi 24 yoshli braziliyalik futbolchini faqat u o‘zi ketishni istasa sotishga tayyor. Transfermarkt portali Rodriqoning narxini 90 million yevro deb baholagan.
