Brugge jamoasida o‘ynab kelayotgan yarim himoyachi Ardon Yashari yaqin vaqt ichida Milan klubi safiga qo‘shilishi kutilmoqda. Bu haqida Euro-football.ru xabar berdi.
23 yoshli futbolchi Italiya klubi taklifiga ijobiy javob berdi. Milan va Brugge o‘rtasida muzokaralar ham muvaffaqiyatli yakunlandi.
Ma’lumotlarga ko‘ra, transfer narxi taxminan 39 million yevroni tashkil etadi. Mashhur sport jurnalisti Nikolo Skira xabariga ko‘ra, Ardon Yashari bolaligidan Milan jamoasida o‘ynashni orzu qilgan.
Shu sababli u boshqa yirik Yevropa klublari, jumladan, Manchester Yunayted, Aston Villa, Borussiya Dortmund va Bayer kabi jamoalarning takliflarini rad etgan. Bundan tashqari, Vest Hem, Nottingem Forest va Saudiya Arabistonining Neom klubi ham futbolchini o‘z safiga qo‘shmoqchi bo‘lgan.
Ardon Yashari Brugge jamoasi tarkibida jami 52 o‘yin o‘tkazib, to‘rt gol va olti golli uzatmaga mualliflik qilgan. Transfermarkt portali ma’lumotiga ko‘ra, futbolchining hozirgi narxi 32 million yevro deb baholangan.
Yashari Milan jamoasiga katta umidlar bilan qo‘shilmoqda va uning faoliyati Italiya klubida qanday davom etishi ko‘pchilikni qiziqtirmoqda.
