Madridning “Real” jamoasi hujumchisi Gonsalo Garsiya klub bilan yangi shartnoma imzolaydi. Bu haqida Euro-football.ru xabar berdi.
Hozirgi shartnomasi 2027 yil o‘rtalarida yakuniga yetadi, biroq tomonlar uni yaqin orada uzaytirishga kelishib olgan. Mahalliy nashrlarning xabar berishicha, 21 yoshli futbolchi bilan shartnomani uzaytirish deyarli hal bo‘lgan va yaqin kunlarda rasmiy bitim imzolanadi.
Gonsalo Garsiya “Real”ning asosiy tarkibida 12 ta o‘yinda maydonga tushib, beshta gol va ikkita golli uzatmaga mualliflik qilgan. Yosh futbolchi joriy yil yozida o‘tgan Klublar o‘rtasidagi Jahon chempionatida ham o‘zini ko‘rsatdi.
U musobaqaning oltita bahsida to‘rtta gol va bitta samarali pas bilan ajralib turdi. “Real” jamoasi 19 avgust kuni o‘z maydonida “Osasuna”ga qarshi bahs olib boradi.
Ushbu uchrashuv Ispaniya chempionati — La Liga yangi mavsumining birinchi turi doirasida bo‘lib o‘tadi. Mazkur o‘yinda ham Garsiyaning ishtiroki kutilmoqda.
Klub rahbariyati va murabbiylar shtabi yosh futbolchidan katta umid qilmoqda.
