Arshavin Qatar terma jamoasi kuchini yuqori baholadi

7 sentyabr kuni Rossiya milliy terma jamoasi Bet Boom do‘stlik uchrashuvida Qatar terma jamoasiga qarshi maydonga tushadi. Bu haqida Euro-football.ru xabar berdi.

Rossiya terma jamoasining sobiq sardori Andrey Arshavin raqib jamoa darajasini baholadi. Arshavinning ta’kidlashicha, Qatar terma jamoasining bu avlodi yoshlar darajasida yaxshi natijalarga erishgan va ko‘plab futbolchilar asosiy terma jamoaga jalb etilgan.

Hozirda Osiyo qit’asida, xususan, Yaqin Sharq mamlakatlari orasida Qatar eng kuchli jamoalardan biri hisoblanadi. Ma’lumot uchun, Qatar terma jamoasi hozirda Osiyo Kubogi sohibi sanaladi.

Biroq jamoa hali Jahon chempionatiga yo‘llanmani qo‘lga kiritmagan. Shu yil kuz faslida Qatar terma jamoasi Osiyo Futbol Konfederatsiyasining to‘rtinchi saralash bosqichida ishtirok etadi.

Shuningdek, 4 sentyabr kuni Rossiya terma jamoasi Iordaniya terma jamoasiga qarshi o‘rtoqlik uchrashuvi o‘tkazadi. Iordaniya jamoasi esa ilk bor o‘z tarixida Jahon chempionatiga chiqish huquqini qo‘lga kiritgan.

Shu tariqa, Rossiya terma jamoasini muhim va kuchli raqiblar bilan o‘yinlar kutmoqda.