Germaniya futbol ittifoqi bosh direktori Andreas Rettig «Barselona» darvozaboni Mark-Andre ter Shtegen va klub o‘rtasidagi ziddiyat haqida fikr bildirdi. Bu haqida Euro-football.ru xabar berdi.
Ma’lum qilinishicha, 33 yoshli darvozabon va klub o‘rtasidagi munosabatlar uning jarohatini tasdiqlovchi tibbiy hujjatni imzolashdan bosh tortgani sababli keskinlashgan. Ter Shtegen bu hujjatni imzolamaganligi sababli, «Barselona» rejalariga o‘zgartirish kiritishga majbur bo‘ldi.
Chunki ushbu hujjat klubga futbolchining maoshining bir qismini boshqa futbolchilarni ro‘yxatdan o‘tkazish uchun sarflash imkonini berardi. Andreas Rettigning so‘zlariga ko‘ra, ter Shtegenning «Barselona» uchun qilgan xizmatlari klub tomonidan inobatga olinishi kerak edi.
Rettig bu masalada xolis baho bera olmasligini ham ta’kidladi. Mark-Andre ter Shtegen 2014 yildan buyon «Barselona» sharafini himoya qilib kelmoqda.
Yaqin kunlarda u sardorlik bog‘ichidan mahrum qilinishi mumkinligi ham aytilmoqda. Holat bo‘yicha klub rasmiylari tomonidan hozircha izoh berilmagan.
Voqealar rivoji kuzatilmoqda.
