Syomin legionerlar cheklovini kuchaytirish tarafdori emas

Mashhur murabbiy Yuriy Syomin Rossiya futbolida legionerlar soniga qo‘yilayotgan cheklovlar haqida o‘z fikrini bildirdi. Bu haqida Euro-football.ru xabar berdi.

Avvalroq Rossiya sport vazirligi kelasi mavsumdan boshlab Premyer-ligada legionerlar bo‘yicha cheklovlar yanada kuchaytirilishini ma’lum qilgandi. Yuriy Syomin bu cheklovlarni kuchaytirish tarafdori emasligini ta’kidladi.

Uning so‘zlariga ko‘ra, futbol tarixida cheklovlar amalda hech qanday foyda keltirmagan. Syominning fikricha, legionerlar soniga qat’iy cheklov o‘rnatishdan maqsad yo‘q, chunki bunday choralar amaliy natija bermaydi.

U futbolchilarning mahoratini oshirish uchun asosan raqobat muhimligini qayd etdi. Syominning ta’kidlashicha, sun’iy to‘siqlar emas, aynan sog‘lom raqobat futbolchilarning rivojlanishiga turtki beradi.

Shuningdek, Syomin rossiyalik futbolchilarni rivojlantirish uchun faqat cheklovlarni kuchaytirish yetarli emasligini, buning uchun sport maktablarida va boshqa sohalarda ham o‘zgarishlar qilish zarurligini aytdi. Hozirda Rossiya Premyer-ligasida “13+8” tartibi amal qiladi.

Har bir klub mavsum davomida 13 nafar legionerni ro‘yxatdan o‘tkazishi mumkin. Uchrashuv vaqtida esa maydonda bir vaqtda 8 nafar legioner futbolchi harakat qilishi mumkin.