«Barselona» futbol klubi hujumkor yarim himoyachisi Dani Olmo jamoani tark etgan va «Al-Nasr» klubiga o‘tgan Inyigo Martines bilan xayrlashdi. Bu haqida Euro-football.ru xabar berdi.
34 yoshli markaziy himoyachi Inyigo Martines Saudiya Arabistonining «Al-Nasr» jamoasiga yangi futbolchi sifatida tanishtirildi. Bu tadbir shanbadan yakshanbaga o‘tar kechasi bo‘lib o‘tdi.
Dani Olmo o‘zining ijtimoiy tarmoqdagi sahifasida quyidagi so‘zlarni yozdi: «Birinchi kundan boshlab sen nafaqat jamoadosh, balki haqiqiy yetakchi, maydonda va undan tashqarida o‘rnak bo‘ladigan inson, do‘st bo‘lding. Senga va oilangga eng yaxshi tilaklarni bildiraman.
Biz seni juda sog‘inamiz, kapitan», – deya ta’kidladi Olmo. 2024/25 yilgi mavsum «Barselona» uchun juda omadli kechdi.
Inyigo Martines ushbu mavsumda 46 ta o‘yinda maydonga tushib, 3 ta gol urdi va 6 ta golli uzatmani amalga oshirdi. U o‘zining fidokorona o‘yinlari bilan muxlislar va jamoadoshlari hurmatini qozondi.
Martinesning yangi jamoada ham muvaffaqiyatli faoliyat olib borishiga tilakdoshmiz.
