«Pari NN» futbolchisi Mamadu Mayga bir emas, uch o‘yinga diskvalifikatsiya qilinishi mumkin. Bu haqida Euro-football.ru xabar berdi.
Bu haqda Rossiya futbol ittifoqi intizomiy qo‘mitasi raisi Artur Grigoryants ma’lumot berdi. Uning so‘zlariga ko‘ra, uchrashuv bayonnomasida futbolchining maydondan chetlatilishiga sabab sifatida «o‘yin qoidalarining jiddiy buzilishi» ko‘rsatilgan.
Hozirda Mamadu Mayganing holati ko‘rib chiqilmoqda va u intizomiy qo‘mita yig‘ilishiga taklif etilgan. Agar futbolchi o‘yin qoidalarini jiddiy ravishda buzgan deb topilsa, u uchta uchrashuvda ishtirok eta olmasligi mumkin.
Eslatib o‘tamiz, o‘tgan yakshanba kuni bo‘lib o‘tgan bahsda Mayga «Rostov» jamoasi a’zosi Konstantin Kuchaevga nisbatan qattiq qo‘pollik ishlatgan. Ushbu hodisa birinchi bo‘limda sodir bo‘lgan va natijada Mayga maydondan chetlatilgan.
«Rostov» jamoasi ko‘pchilikda qolgan holda Timur Suleymanovning goli evaziga raqib ustidan minimal hisobda g‘alaba qozondi. Shuningdek, Konstantin Kuchaev o‘z bayonotida unga jarohat yetmaganidan omadi kelganini aytib o‘tdi.
Hozirda intizomiy qo‘mita ushbu holatni to‘liq o‘rganmoqda va yakuniy qaror tez orada e’lon qilinadi.
