Saloh Premer-liganing eng yaxshi futbolchisi deb topildi
Yangi mavsum boshlanishi arafasida Angliya Premer-ligasining eng yaxshi faol futbolchilari reytingi e’lon qilindi. Bu haqida Euro-football.ru xabar berdi.
ESPN axborot agentligi jurnalistlari tomonidan tuzilgan ushbu ro‘yxatda jami 50 nafar futbolchi o‘rin oldi. Reytingda birinchi o‘rinni “Liverpul” klubi hujumchisi Muhammad Saloh egalladi.
U o‘tgan mavsumda yuqori natijalar ko‘rsatib, shartnomasini yana ikki yilga uzaytirdi. Ikkinchi o‘ringa “Chelsi” jamoasi yetakchisi Koul Palmer joylashgan.
Kuchli uchlikni esa “Manchester Siti” klubi hujumchisi Erling Holand yakunlab berdi. Bundan tashqari, kuchli o‘ntalikdan Bukayo Saka, Aleksandr Isak, Virjil van Deyk, Deklan Rays, Bruno Gimaraesh, Brunu Fernandesh va Vilyam Saliba ham o‘rin oldi.
Ularning barchasi Angliya chempionatining eng faol va samarali futbolchilari sifatida e’tirof etildi. Angliya Premer-ligasining 2025/2026 yilgi mavsumi 15 avgust kuni boshlanishi rejalashtirilgan.
Yangi mavsumda ham futbol ishqibozlarini ko‘plab qiziqarli uchrashuvlar va yuqori darajadagi o‘yinlar kutmoqda. Reyting natijalari futbolchilarning o‘tgan mavsumdagi yutuqlari va maydondagi faoliyatini inobatga olgan holda tuzilgan.
