Donnarumma “Manchester Siti”ga o‘tishga rozilik berdi

PSJ darvozaboni Janluiji Donnarumma “Manchester Siti” jamoasiga o‘tishga rozilik berdi. Bu haqida Euro-football.ru xabar berdi.

Italiya terma jamoasi a’zosi bo‘lgan Donnarumma seshanba kuni Parij klubini tark etishini ma’lum qildi. Uning so‘zlariga ko‘ra, klub rahbariyati endi unga ishonch bildirmayapti.

26 yoshli darvozabon bilan “Manchester Siti” klubi allaqachon kelishuvga erishgan. Hozirda ingliz klubi PSJ bilan transfer shartlarini muhokama qilmoqda.

“Manchester Siti” vakillari Donnarummaning o‘yinini uzoq vaqtdan beri kuzatib keladi. Ular bu imkoniyatdan foydalanib, tajribali va iste’dodli darvozabonni jamoaga qo‘shib olishni istashmoqda.

Donnarummaning shartnomasi kelasi yili yakunlanishi sababli, uni nisbatan arzon narxda sotib olish imkoniyati mavjud. Klub rahbariyati bu transfer orqali jamoaning darvozadagi raqobatini kuchaytirishni maqsad qilgan.

Hozircha tomonlar o‘rtasida yakuniy bitim imzolanmagan, muzokaralar davom etmoqda. Donnarummaning “Manchester Siti”ga o‘tishi yaqin orada rasman e’lon qilinishi kutilmoqda.