Markaziy himoyachi Viktor Lindelof faoliyatini Ispaniya chempionatida davom ettirishi mumkin. Bu haqida Euro-football.ru xabar berdi.
Ayni paytda “Selta” klubi sobiq “Manchester Yunayted” futbolchisini o‘z safiga qo‘shib olishga qiziqish bildirmoqda. Shuningdek, 31 yoshli shved futbolchisi Germaniyaning “Bayer” (Leverkuzen) jamoasi radariga ham tushgan.
Mazkur klubni ilgari “Manchester Yunayted” bosh murabbiyi bo‘lgan Erik ten Hag boshqarib kelmoqda. Viktor Lindelof hozirda erkin agent hisoblanadi.
Uning “Manchester Yunayted” bilan tuzgan shartnomasi iyul oyining boshida yakuniga yetgan. U ingliz klubida 2017 yil yozidan buyon to‘p surib kelgan edi.
O‘tgan mavsum Ispaniya chempionatida “Selta” jamoasi yettinchi o‘rinni egalladi. Yangi mavsumning birinchi turida, 17 avgust kuni “Selta” o‘z maydonida “Xetafe” klubiga qarshi bahs olib boradi.
Klub hozirda tarkibini mustahkamlash maqsadida yangi futbolchilarni jalb qilish ustida ish olib bormoqda. Viktor Lindelof esa o‘zining keyingi faoliyatini qaysi jamoada davom ettirishini hali aniq belgilamagan.
