Hakimi Afrikalik futbolchilar orasida uchinchi eng sovrindor
PSJ jamoasining o‘ng qanot himoyachisi Ashraf Hakimi o‘z jamoasi bilan yana bir yutuqqa erishdi. Bu haqida Euro-football.ru xabar berdi.
Chorshanba kuni Parij klubi UEFA Superkubogi uchun o‘tkazilgan bahsda Tottenxem ustidan g‘alaba qozondi. Luis Enrike boshchiligidagi jamoa asosiy vaqt oxirida ikki bor gol urib, hisobni tenglashtirdi va o‘yin 2:2 hisobida yakunlandi.
Keyin esa penaltilar seriyasida raqibdan ustun keldi. Ashraf Hakimi ushbu uchrashuvda asosiy tarkibda maydonga tushdi va uchrashuvni to‘liq o‘tkazdi.
Bu marokashlik futbolchi uchun faoliyati davomida qo‘lga kiritilgan 17-trofey bo‘ldi. Bu natija afrikalik futbolchilar orasida uchinchi eng yaxshi ko‘rsatkich hisoblanadi.
Faqatgina kamerunlik Samuyel Eto‘O va kot-d’ivuarlik Yaya Ture undan ko‘proq sovrin yutgan. Ularning har biri faoliyati davomida 18 ta kubokni qo‘lga kiritgan.
Mutaxassislarning fikricha, aynan joriy mavsumdayoq Ashraf Hakimi ushbu ikki mashhur futbolchidan o‘zib ketishi va afrikalik futbolchilar orasida eng ko‘p sovrin yutgan futbolchi bo‘lishi mumkin. Shu tariqa Hakimi o‘z yutuqlari bilan nafaqat jamoasi, balki butun qit’ada mashhurlikka erishmoqda.
