«Liverpul» Angliya Premer-ligasi 35-turi doirasida o‘z uyida «Tottenxem» jamoasini yirik 5:1 hisobida yengib, chempionlik unvonini muddatidan avval naqd qildi.
27 aprel kuni bo‘lib o‘tgan uchrashuvdan keyin mersisaydliklar jami 82 ochko bilan turnir jadvalida eng yaqin ta’qibchilaridan sezilarli darajada oldinga chiqib, birinchi o‘rinni kafolatladi.
Bu chempionlik «Liverpul» bosh murabbiyi, niderlandiyalik Arne Slot uchun ham Angliya futbolidagi ilk sovrin sifatida tarixga kirdi. E’tiborlisi, Slot Angliya Premer-ligasida g‘alaba qozongan birinchi niderlandiyalik murabbiyga aylandi. U jamoa boshqaruviga 2024 yilning yozida kelgandi.
Eslatib o‘tamiz, «Liverpul» bundan avval chempionlik unvonini 2019/20 yilgi mavsumda Yurgen Klopp rahbarligida qo‘lga kiritgan edi. Arne Slotning tayinlanishi bilan jamoa qaytadan yuqori cho‘qqiga ko‘tarilib, butun mavsum davomida yuqori sur’atli va ishonchli o‘yini bilan barchaning e’tiborini o‘ziga jalb etdi.
Shunday qilib, «Liverpul» muxlislari orziqib kutayotgan chempionlik nishonlanmoqda. Arne Slot esa Angliya futbolidagi o‘zining yangi sahifasini g‘alaba bilan boshladi.
