Madridning “Real” klubi tarkibida so‘nggi o‘n yilda afsonaga aylangan, jahon futbolida o‘z nomini mustahkam o‘rnatgan Luka Modrich jamoa bilan xayrlashmoqda. 39 yoshli xorvat pleymeykeri bu haqda rasman bayonot berdi va muxlislar bilan samimiy vidolashdi.
“Qadrli 'Real' oilasi, unutilmas lahza yetib keldi. Shanba kuni 'Santyago Bernabeu'dagi so‘nggi uchrashuvimni o‘tkazaman. Mana shu stadiondagi oxirgi qadamlarimni bosaman. Albatta, buni doim kechroq bo‘lishiga umid qilgandim, lekin futbolda har narsaning boshi va oxiri bor. Bu hayotning bir qismi”, — dedi u yurakdan chiqqan so‘zlar bilan.
Modrich 2012 yilda “Tottenxem”dan “Real”ga o‘tgan edi. Uning aytishicha, o‘shanda jamoa bilan muvaffaqiyatli faoliyat olib borish niyatida bo‘lgan, ammo bu darajadagi yutuqlarga erishishini o‘zi ham tasavvur qilmagan.
“Men futbolchi sifatida madridda yangi hayot boshladim. Bu yerda futbolni boshqacha angladim. Har bir musobaqada g‘alaba qozonish, har bir finalda sevinch ko‘rish — shunday yuksak darajadagi hissiyotki, so‘z bilan ifodalash qiyin. Eng muhimi, men bu yerda faqat sovrinlar emas, balki chin yurakdan muhabbatni topdim. Muxlislarning qo‘llab-quvvatlashi, har bir ovatsiya va tribunalardagi muhabbat meni butunlay maftun etdi”, — deb qayd etdi Luka.
U o‘z minnatdorchiligini klub prezidenti Florentino Peres, murabbiylar shtabi, jamoadoshlari va jamoada faoliyat olib borgan barchaga izhor etdi. Shuningdek, “Real”dagi yo‘li davomidagi “remonta”lar, finallar va “Bernabeu”dagi sehrli kechalar haqida gapirar ekan, u bu lahzalarni abadiy yodda saqlashini ta’kidladi.
“Har bir chempionlik, har bir ko‘tarilgan sovrin men uchun alohida qadrli. Lekin eng katta boyligim – bu 'Real'ning bir bo‘lagiman deb his qilishim”, — dedi u.
Modrich madridliklar safida 590 ta uchrashuvda ishtirok etdi, 43 ta gol urdi, 95 ta assist amalga oshirdi. U bilan birga “qaymoqranglilar” 6 marta Chempionlar Ligasini, 4 marta La Ligani, 2 marta Ispaniya Kubogini va 5 marta Superkubokni yutib oldi. Bundan tashqari, u UYEFA Superkubogi va klublar o‘rtasidagi jahon chempionatida ham “Real” tarkibida zafar quchdi.
Modrich so‘zini shunday yakunladi: “Men klublar o‘rtasidagi jahon chempionatidan so‘ng rasman ketaman. Lekin 'Real' abadiy yuragimda qoladi. Men endi har doimgidek jamoamning muxlisi bo‘laman. Minnatdorlik bilan ketaman, orqamda tarix qoldirdim”.
Zamin.uz tahririyati afsonaviy futbolchining “Real”dagi faoliyatini ulkan ehtirom bilan e’tirof etadi va unga kelgusi yo‘lida omad tilab qoladi. Siz Modrichning qanday lahzalarini eslaysiz? Uning o‘rnini kim bosishi mumkin?
