Parijning «PSJ» klubi yetakchi darvozaboni Janluiji Donnarumma bilan yangi shartnoma tuzish borasidagi muzokaralar borasida bir to‘xtamga kelolmayapti. Agar tomonlar kelishuvga erishmasa, italiyalik yulduz Parijni tark etishi ehtimoli juda yuqori.
26 yoshli futbolchining amaldagi shartnomasi 2026 yil yozida yakunlanadi. Ammo tomonlar yangi bitim shartlari ustidagi kelishmovchiliklar sababli, Yevropaning yetakchi klublari ushbu vaziyatdan foydalanishga va Donnarummani o‘z tarkibiga qo‘shib olishga harakat qilmoqda.
Ma’lumotlarga ko‘ra, Donnarumma «PSJ»dan mavsumiy maosh sifatida kamida 10 million yevrodan yuqori bo‘lgan yangi taklif kutayapti. Fransiya klubi rahbariyati hozircha bu talabga rozi bo‘ladimi yoki yo‘q, bu haqda aniq ma’lumot yo‘q.
Shu bilan birga, Donnarummaga bir nechta taniqli klublardan qiziqish mavjudligi aytilmoqda. Eng asosiy da’vogar sifatida Germaniyaning «Bavariya» jamoasi tilga olinmoqda. Bavariyaliklar asosiy tarkib darvozaboni – 39 yoshli Manuel Noyerning munosib o‘rinbosari sifatida aynan Donnarummani ko‘rishmoqda.
Shuningdek, Ispaniyaning «Real Madrid» klubi ham ushbu transfer bilan jiddiy qiziqyapti. Hozirda jamoaning asosiy darvozaboni bo‘lgan 33 yoshli belgiyalik Tibo Kurtuaning o‘rnini yaqin kelajakda to‘ldirish uchun klub rahbariyati Donnarummani tanlamoqchi.
Bundan tashqari, italiyalik golkiperga Angliya Premer-ligasidan ham qiziqish borligi aytilgan, ammo aniq qaysi klublar ekanligi haqida ma’lumot berilmagan.
Eslatib o‘tamiz, o‘tgan mavsum Donnarumma «PSJ» tarkibida barcha musobaqalarda jami 40 ta uchrashuvda maydonga tushdi. U shu o‘yinlarning 12 tasida o‘z darvozasini dahlsiz saqlab qolishga muvaffaq bo‘lgan.
Transfermarkt portali ma’lumotiga ko‘ra, futbolchining hozirgi bozor bahosi 40 million yevroni tashkil etadi va uning transferi Yevropadagi katta klublar uchun asosiy maqsadlardan biriga aylangan.
Shunday qilib, joriy yozda Donnarummaning kelajagi Yevropadagi transfer bozorida eng shov-shuvli mavzulardan biri bo‘lishi kutilmoqda. «PSJ» rahbariyatining yakuniy qarori jamoaning kelgusi mavsumdagi tarkibiga jiddiy ta’sir qilishi mumkin.
