Abduqodir Xusanov — Osiyo futbolidagi eng qimmat o‘yinchiga aylandi!
O‘zbek futbol tarixi yana bir bor yozilayotgani rost! “Manchester Siti” markaziy himoyachisi Abduqodir Xusanov rasman Osiyoning eng qimmat futbolchisiga aylandi. Bu haqda Transfermarkt portali e’lon qilgan so‘nggi baholash natijalari tasdiq bo‘ldi.
21 yoshli Xusanovning bozor qiymati hozirda 35 million yevroga yetdi — bu Osiyodagi barcha futbolchilar orasida eng yuqori ko‘rsatkichdir. Ushbu natija nafaqat O‘zbekiston futboli uchun, balki butun mintaqa uchun jahon miqyosidagi muvaffaqiyat hisoblanadi.
Kimlardan ustun?
Yangi reytingda Abduqodirni quyidagilar kuzatib boryapti:
- Takefusa Kubo (Yaponiya, €30 mln, Real Sociedad)
- Li Kan In (Koreya, €25 mln, PSG)
- Zayon Suzuki (Yaponiya, €20 mln, Parma)
- Kaishu Sano, Xyonmin Son, Xi Chan Xvang kabi yulduzlar ham Xusanovdan pastda joylashgan.
Ayni vaqtda katta tajribaga ega “Tottenhem” yetakchisi Son Xin Min yoki PSJda to‘p surgan Li Kan In ham Abduqodirdan ortda qolgani — uning qanday yuqori tempda o‘sib borayotganini yana bir bor namoyon etmoqda.
Yevropa klublarining diqqatida
Xusanovning 21 yoshida bu qadar yuqori qiymatga yetishi uning professional o‘sish trayektoriyasidan darak beradi. “Manchester Siti”dagi mashg‘ulotlar va o‘yinlar orqali u katta murabbiylar va klublar diqqati markazida. Mutaxassislar tez orada uni jamoa yetakchilaridan biriga aylanishi mumkinligini ta’kidlashmoqda.
O‘zbek futboli uchun g‘ururli payt
Bu muvaffaqiyat O‘zbekiston futbol tarixida ilk bor qayd etildi. Hech bir o‘zbek futbolchisi bundan avval Osiyo reytingining yetakchi o‘rnini egallamagan. Xusanovning yuksalishi orqali butun dunyo o‘zbek futbolchilari salohiyatiga yana bir bor ishonch bilan qaray boshladi.
Abduqodir Xusanov bugun nafaqat "Manchester Siti"ning, balki butun Osiyoning yuziga aylanmoqda. Uning safida yana ko‘p qirralar, jahon futbolidagi katta sinovlar va buyuk g‘alabalar kutmoqda. O‘zbek futbol muxlislari esa uning har bir yutug‘ini faxr va iftixor bilan kuzatishda davom etadi.
