Maksim Shatskix o‘zining rekordini yo‘qqa chiqargan Shomurodovga qanday baho berdi?

O‘zbekiston milliy terma jamoasiga sardorlik qilayotgan Eldor Shomurodov bu jamoa tarixidagi eng zo‘r to‘purar hisoblanadi.

29 yoshli futbolchimiz xalqaro miqyosda 78 ta uchrashuvda raqiblar darvozasiga 41 ta to‘p kiritgan. Terma jamoadagi to‘purarlik rekordi Eldorgacha uzoq muddat Maksim Shatskixga tegishli bo‘lgan. Asosan xorij klublarida to‘p tepgan Shatskix mamlakatimiz bosh jamoasi uchun 60 ta o‘yinda 33 ta gol urgan edi.

Ayni paytda o‘zi tarbiyalangan “Paxtakor” klubi prezidentining sport ishlari bo‘yicha maslahatchisi bo‘lib ishlayotgan Maksim Shatskix o‘z hamkasbi haqidagi savollarga javob qaytardi.

- O‘zbekiston milliy terma jamoasi to‘purari Eldor Shomurodov “Roma”ning fevral oyidagi eng zo‘r futbolchisi bo‘ldi. O‘zbek hujumchisining o‘yiniga qanday baho berasiz?

- Albatta, bu juda katta natija! “Roma” Yevropada o‘z o‘rniga ega bo‘lgan klub. Shomurodov uzoq vaqt o‘ynay olmayotgan edi va fevralda asosiy tarkib o‘yinchisiga aylandi. Eldor bosh murabbiy unga ishonib, xato qilmaganini ko‘rsata oldi.

Shomurodov assistlarni amalga oshirdi, o‘zi gol urdi, jamoasiga foyda keltirdi. Men Shomurodov haqli ravishda “Roma”ning eng yaxshi o‘yinchisi bo‘ldi, deb hisoblayman.

Ayniqsa, bu O‘zbekiston milliy terma jamoasi o‘yinlari oldidan juda muhim voqea bo‘ldi. Bu Eldor uchun katta plyus.

- Klaudio Ranerining kelishi Eldorning o‘yiniga ta’sir qildimi? Tajribali murabbiy qo‘l ostida “Roma” mana 11 ta uchrashuvdan beri hech kimga yutqazmayapti...

- Bo‘lishi mumkin. Umuman olganda, Eldor Shomurodov va Artyom Dovbik hozirgi paytda Rim klubining asosiy ikki hujumchilaridir. Raneri ularni almashtirib o‘ynatishga harakat qilmoqda.

“Komo” bilan bo‘lgan bellashuvda Dovbik g‘alaba to‘pini kiritdi. Raneri hammaga o‘yin amaliyoti va vaqt berishga harakat qilyapti.

Bosh murabbiy Dovbik va Shomurodov umumiy hisobda bir xil forvardlar ekanini yaxshi tushunadi. Shunday ekan, ularni nega rotatsiya qilish mumkin emas? Bundan futbolchilar ham mamnun, natija ham hammani qoniqtirmoqda. Buni men ham ma’qullayman.

Ta’kidlash joizki, “Roma” ayni paytda A Seriyada Yevropa kuboklariga yo‘llanma beradigan kuchli oltilikka kirish uchun kurashmoqda. Klaudio Raneri kelganidan keyin “bo‘rilar” musobaqa jadvalining quyi qismidan sakkizinchi o‘ringa ko‘tarilib oldi.

Bundan tashqari, Raneri jamoani Yevropa ligasining umumiy bosqichidan olib o‘tdi va pley-off o‘tish o‘yinlarida “Portu”ni ortda qoldirdi. Endi rimliklar chorak finalga chiqish uchun Bilbaoning “Atletik” jamoasi bilan o‘zaro ikkita uchrashuv o‘tkazadi.

O‘yini ochilib borayotgan Eldor Shomurodov joriy mavsumda barcha turnirlarda 24 marotaba maydonga tushib, o‘z hisobiga to‘rtta gol va uchta assist yozdirib qo‘ydi.