Fransiyaning PSJ klubi Chempionlar Ligasi doirasida o‘z maydonida Angliyaning "Liverpul" jamoasini qabul qildi va kutilmagan mag‘lubiyatga uchradi. Garchi parijliklar butun o‘yin davomida tashabbusni qo‘lga olgan va hujumkor o‘yin namoyish etgan bo‘lsalar-da, mehmonlar atigi bitta aniq zarba bilan g‘alaba qozonishdi.
- PSJ 10 ta aniq zarba yo‘lladi, ammo birortasi golga aylanmadi.
- "Liverpul" esa birgina imkoniyatdan samarali foydalanib, g‘alaba qozondi.
Luis Enrike: “Yo‘qotadigan narsamiz yo‘q”
Uchrashuvdan keyin PSJ bosh murabbiyi Luis Enrike jamoasining o‘yini haqida fikr bildirdi:
“Biz vaziyatlar bo‘yicha "Liverpul"dan ustun edik, ko‘proq hujumlar va nazoratni qo‘lga oldik. Bugun qanday o‘ynagan bo‘lsak, "Enfild"da ham shunday o‘yin ko‘rsatamiz. Yo‘qotadigan narsamiz yo‘q".
Mutaxassis mag‘lubiyat sabablariga ham to‘xtalib o‘tdi:
Alisson Bekkerning ajoyib o‘yini – “Liverpul” darvozaboni 5 ta mukammal seyf qildi va PSJ hujumlariga to‘sqinlik qildi.
Omadsizlik va realizatsiya muammolari – PSJ ko‘plab imkoniyatlar yaratdi, ammo hech birini golga aylantira olmadi.
"Keyingi bosqichga chiqamizmi, yo‘qmi – bilmayman. Lekin biz qo‘ldan kelgan barcha harakatni qilamiz!" – dedi Enrike.
PSJ ketma-ket 10 o‘yinlik g‘alabadan keyin mag‘lub bo‘ldi
Fransiya klubi ayni paytda Yevropaning eng kuchli jamoalaridan biri sifatida ko‘rilmoqda. Jamoa ushbu uchrashuvgacha ketma-ket 10 ta bahsda g‘alaba qozongandi.
Bu mag‘lubiyatga qaramasdan, PSJ Chempionlar Ligasida jiddiy raqobatga tayyorligini namoyish etdi. Keyingi uchrashuv "Enfild"da bo‘lib o‘tadi va parijliklar bu o‘yinda vaziyatni o‘zgartirishga intiladi.
Futbol ishqibozlari uchun bu to‘qnashuv Chempionlar Ligasining eng qiziqarli o‘yinlaridan biri bo‘lishi kutilmoqda.
