Anchelotti: “Real”dan faqat prezident meni ketkazishi mumkin
Madridning “Real” klubi bosh murabbiyi Karlo Anchelotti o‘z kelajagi haqida fikr bildirdi. Italiyalik mutaxassisning ta’kidlashicha, uning jamoada qolishi yoki ketishi faqat rahbariyat qaroriga bog‘liq. “Men hech qachon o‘z xohishim bilan ketmayman – bu faqat prezidentning qarori bo‘ladi. Ertami-kechmi bu sodir bo‘ladi”, – dedi Anchelotti italiyalik aktyor Jyakomo Poretti podkastida.
65 yoshli mutaxassisning “Real” bilan shartnomasi 2026-yilning yozigacha davom etadi. Shunga qaramay, matbuotda uning o‘rniga Xabi Alonso nomzodi ko‘rib chiqilayotgani haqida xabarlar tarqalmoqda. Hozirda Alonso Germaniyaning “Bayer” klubini boshqarib, ajoyib natijalarga erishmoqda.
La Liganing 26-turidan so‘ng “Real” 54 ochko bilan turnir jadvalida uchinchi o‘rinda bormoqda.
