Pep Gvardiola: "Agar "Manchester Siti" YECHLga chiqa olmasa, hayot tugamaydi"
Pep Gvardiola "Nottingem Forrest"ga qarshi o‘yin oldidan quyidagi fikrlarni bildirdi:
“Abduqodir Husanovning o‘yinlarga ta’siri ajoyib bo‘ldi. Vitor ham Plimutga qarshi yaxshi o‘yin o‘tkazdi.
Biz o‘tgan 8-10 hafta haqida gapirayapmiz, bu anchagina ko‘p vaqt. Omadimiz kelgani - klub bu futbolchilarni yozda olib kelishdan ko‘ra, qishda jamoaga qo‘shib olishi bo‘ldi. Yo‘qsa biz katta muammolarga yuz tutgan bo‘lardik”.
Shuningdek, "Manchester Siti" bosh murabbiyi Pep Gvardiola jamoasining Yevropa Chempionlar Ligasiga yo‘llanma olmasligi katta falokat emasligini ta’kidladi. Uning so‘zlariga ko‘ra, klublar doimo bosim ostida bo‘ladi, ammo bu futbolning bir qismi hisoblanadi.
"YECHLga chiqishni xohlaymiz, lekin bu hamma narsaning oxiri emas"
Gvardiola ushbu mavsumda "Manchester Siti" uchun vaziyat ideal emasligini tan oldi, biroq jamoa baribir chempionlik va YECHL yo‘llanmasi uchun kurashda qolmoqda.
"Katta klublarda doimo bosim bo‘lib kelgan. Biz albatta YECHLga chiqishni istaymiz, biroq bu amalga oshmasa ham, dunyo tugab qolmaydi. Bu holat biz yetarlicha kuchli bo‘lmaganimizni, raqiblar esa bunga munosibligini anglatadi. Ammo biz barcha imkoniyatlarimizdan foydalanishga harakat qilamiz", — dedi Gvardiola.
APLdagi vaziyat
Hozirda "Manchester Siti" Angliya Premer Ligasi turnir jadvalida 4-o‘rinni egallab turibdi. Bu mavqe Gvardiola jamoasiga Chempionlar Ligasi yo‘llanmasini qo‘lga kiritish imkonini beradi, biroq mavsum yakunigacha jamoaga jiddiy raqobat kutilmoqda.
"Hozirgi holatimiz ideal emas, biroq yomon ham emas. Barchasi o‘z qo‘limizda va biz YECHL uchun kurashamiz", — deya qo‘shimcha qildi murabbiy.
Gvardiolaning fikricha, "Manchester Siti" mavsum oxirigacha o‘z pozitsiyasini yaxshilash va Chempionlar Ligasi yo‘llanmasini qo‘lga kiritish uchun barcha imkoniyatlarga ega.
